Гары Потэр і таямніца кніжнага чарвяка

(казка)

_{"Наўрад ці знойдуцца іншыя жывёлы, якія адыгрывалі б настолькі вялікую ролю ў гісторыі свету, як дажджавыя чарвякі"}

_{Чарльз Дарвін}

Усім вядома, што чарвякі вельмі карысныя.

Яны мільёны гадоў рыхляць глебу, ад чаго раслінам становіцца прасцей дыхаць, харчавацца ды расці.

Але вы, мажліва, ня ведаеце, што галоўная радасць для чарвякоў – выбрацца ў дождж на паверхню зямлі, каб поўзаць па лужынах, лопаючы бурбалкі на вадзе.

Дык вось. Менавіта ў такі цудоўны дажджлівы дзень адзін чарвяк, круцячыся ды рыпаючыся па лужынах, нечакана для сябе трапіў у старую-старую ды амаль закінутую кніжную краму. І адправіўся ён вандраваць па кніжных паліцах, адкрываючы для сябе літаратуру.

Чарвяк узяўся чытаць кнігі – спачатку дзяцячыя, дзе амаль адны малюнкі. Потым – прыгоды і фантастыку. Потым класіку. Філасофію. Прыродазнаўчыя навукі. І, урэшце, чарвяк вырашыў сам напісаць кнігу. Высветлілася, што пісаць не задужа складана – рукапісныя ж літары вельмі падобныя на чарвякоў! Па вушы вышмараваўшыся ў фіялетавае чарніла, чарвяк пачаў пісаць раман, у захапленні скочучы па аркушах паперы і аддрукоўваючы сваім целам літары-чарвячкі (добра, што белай паперы вакол было звышдастаткова). Прычым галоўным мейсцам дзеяння рамана ён зрабіў сваю краму, пераўтварыўшы яе ў частку Краіны Чараўніцтва.

А далей было вось што: аднойчы ў кніжную краму зазірнула настаўніца англійскай мовы па імені Джо. Убачыла яна стос паперы, якая была спісаная фіялетавымі літарамі-чарвячкамі, пачала чытаць – і проста ачмурэла. То бок больш увогуле не магла ні аб чым думаць – настолькі ёй спадабалася.

Ну, а потым хітрамудрая Джо дамовілася з чарвяком, што надрукуе раман у чалавечым выдавецтве, а ганарар яны распалавіняць.

Рэдактар выдавецтва, калі ўбачыў вокладку кнігі, на якой у якасці аўтараў былі азначаны Джо і чарвяк, літаральна зваліўсяпад стол ад рогату. Аднак з-пад стала яму ўсё ж атрымалася ўгаварыць дружную парачку пакінуць на вокладцы толькі прозвішча настаўніцы – Джоан Роўлінг.

Вось так і з’явілася серыя раманаў аб Гары Потэры – доўгая, як хвост чарвячка.

- Канец -